އެމެރިކާގެ އަސްކަރިއްޔާއިން އެއް މަސް ދުވަހުގެ މެދުކެނޑުމަކަށްފަހު އަނެއްކާވެސް އީރާނަށް ޙަމަލާދޭން ވަނީ ފަށާފައެވެ. މިގޮތުން ހޮރްމޫޒް ކަނޑުއޮޅީގައި އޮންނަ އީރާނުގެ ލަރަކް ރަށުގައި ހުރި ރޮކެޓް ލޯންޗަރުތަކަކަށް އާދީއްތަ ދުވަހު އެމެރިކާއިން ވަނީ ވަރުގަދަ ޙަމަލާތަކެއް ދީފައެވެ. މި ޙަމަލާތަކަކީ އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ކަނޑުގެ ސަރަޙައްދަށް މައިން އެޅުމަށް ހުރަސްއެޅުމުގެ ގޮތުން ދިން ޙަމަލާތަކެއް ކަމަށް ރިޕޯޓުތައް ބުނެއެވެ.
އެމެރިކާގެ ސެންޓްރަލް ކޮމާންޑް (ސެންޓްކޮމް) އިން މަޢުލޫމާތު ދިން ގޮތުގައި، ޙަމަލާ ދީފައިވަނީ އީރާނުގެ ފަރާތުން ވިޔަފާރި ބޯޓުފަހަރު ދަތުރުކުރާ މަގުތަކަށް ނުރައްކާވާ ގޮތަށް މައިން ހަރުކޮށްފައިވާ ރޮކެޓްތަކެއް ފޮނުވާލަން ތައްޔާރުވަމުން ދިޔަތަން ފެނުމާ ގުޅިގެންނެވެ. އެމެރިކާގެ ސިފައިން ދާދި ފަހުން އެ ސަރަޙައްދުގައި ހުރި މައިންތައް ސާފުކޮށްފައި ވަނިކޮށް، އަލުން މައިން އެޅުމަށް އީރާނުން މަސައްކަތްކުރުމަކީ ބައިނަލްއަޤްވާމީ ދަތުރުފަތުރަށް އޮތް ވަރަށް ބޮޑު ނުރައްކަލެއް ކަމަށް އެމެރިކާއިން ސިފަކުރެއެވެ.
މި ޙަމަލާތަކާ ގުޅިގެން އީރާނުގެ އަސްކަރިއްޔާއިން ބުނެފައިވަނީ، ލަރަކް ރަށަށް އެމެރިކާއިން ދިން ޙަމަލާގައި ޢާންމު ރައްޔިތުންނާއި އަސްކަރީ ބައެއް މީހުން މަރުވެ އަދި ޒަޚަމްވެފައިވާ ކަމަށެވެ. މިއީ އެމެރިކާއިން ހެދި ވަރަށް ބޮޑު ގޯހެއް ކަމަށް ސިފަކޮށް، އައި.އާރް.ޖީ.ސީ އިން ވަނީ މިކަމުގެ ބަދަލު ވަރަށް ހިތްދަތި ގޮތަކަށް އެމެރިކާގެ ކިބައިން ހިފާނެ ކަމުގެ އިންޒާރު ދީފައެވެ.
އެމެރިކާގެ ޙަމަލާއަށް ރައްދު ދިނުމުގެ ގޮތުން އީރާނުން ވަނީ އުރުދުންގައި ހުންނަ އެމެރިކާގެ އަސްކަރީ މަރުކަޒުތަކަށް އަމާޒުކޮށް ބެލިސްޓިކް މިސައިލްތަކެއް ފޮނުވާލާފައެވެ. ނަމަވެސް، އުރުދުންގެ އަސްކަރިއްޔާއާއި އެމެރިކާގެ ސިފައިން ގުޅިގެން ވަނީ މި މިސައިލްތައް ވައިގެ ތެރޭގައި ގޮއްވާލައި، ޙަމަލާތައް ނާކާމިޔާބުކޮށްލާފައެވެ. މި ހާދިސާތަކާއެކު މެދުއިރުމަތީގެ މަސްރަޙު ވަނީ އަނެއްކާވެސް ވަރަށް ބޮޑަށް ހޫނުވެފައެވެ.
މި ކުރިމަތިލުންތަކުގެ ސަބަބުން ދުނިޔޭގެ އިޤްތިޞާދަށްވެސް އަންނަނީ އޭގެ ނޭދެވޭ އަސަރު ކުރަމުންނެވެ. ދުނިޔޭގެ ތެލުގެ ބާޒާރުގައި ތެލުގެ އަގު އުފުލި، ބްރެންޓް ކްރޫޑް ފީފާއެއްގެ އަގު ވަނީ 90 ޑޮލަރާ ގާތްކޮށްފައެވެ. ހޮރްމޫޒް ކަނޑުއޮޅިއަކީ ދުނިޔޭގެ ތެލުގެ ވިޔަފާރީގެ 20 އިންސައްތަ ދަތުރުކުރާ މަގަށް ވުމާއެކު، މި ސަރަޙައްދުގައި ހިނގަމުންދާ ހަމަނުޖެހުންތަކަކީ ބައިނަލްއަޤްވާމީ ވިޔަފާރިއާއި އިޤްތިޞާދަށް އޮތް ބޮޑު ބިރެއްކަމަށް މާހިރުން ދެކެއެވެ.